DAGUNDONG

Dumadagundong ang bawat
pintig ng aking puso
Sa bawat hagupit at latay na aking nasasaksihan
Na dulot ng makamandag na latigo
ng mga naghahari-harian

Hagupit at latay
na walang imik at mapagkumbabang
tinitiis, tinanggap
ng walang lakas
ng walang boses na masa

Dumadagundong ang bawat
pintig ng aking puso
sa bawat pang-aabuso sa lakas paggawa
sa bawat pangangamkam ng lupang sakahan
sa bawat pagkakait ng karunungan

Pang-aapi at pang-aalipin
na dulot ng mga tagakalinga sana
na pinalala pa ng mga walang pakialam
na pwede naman sana nilang isatinig
na pwede naman sana nilang iresolba

Dumadagundong ang bawat
pintig ng aking puso
at sa bawat alingawngaw nito sa sangkatauhan
at sa paglamon nito sa mala-piitang pagkapipi
nawa'y mapalaya ang nakakulong sa gibik...

...gibik para sa isang
malaya at masaganang lipunan.

ANG KATANUNGAN

Nagtanong ako
kung ano ang pinagmulan natin.
Ang tugon sa akin,
"Ang katotohanan ng ating pinagmulan
ay hindi katanungan
kundi kaalaman na dapat
mong paniwalaan."
Subalit paano ko malalaman
ang katotohanan
kundi ako tugunan
upang ito ay aking malaman.
Ang sabi naman ngayon,
"Tama ka nga naman."
Samakatwid,
"Ang ating kaalaman
sa katotohanan ay natutugunan
sa pamamagitan ng katanungan."

Nagtanong muli ako
kung paano ako mamuhay sa mundo.
Ang sagot sa akin,
"Mamuhay ka ayon sa iyong pinagmulan,
ang gusto kong ipaalam ay
mamuhay ka sa kabutihan."
"Huwag mo nang tanungin ang pinagmulan
dahil ito ay iyong nalalaman
ngunit ayaw mo lamang paniwalaan
kaya palagi mo itong binabalik-balikan."

Nagtanong na naman muli ako
kung bakit ako mamumuhay
ayon sa aking pinagmulan
na ayaw ko raw paniwalaan.
Ang sabi sa akin,
"Upang ikaw ay makapunta at makabalik
sa ating pinagmulan at
iyong maranasan ang buhay
na walng hanggan
sa habambuhay na kasiyahan."

MANHID

Lumuluha ng dugo
ang mga bituin
Ang mga ibon ay humuhuni
ng malungkot na awitin

Nagdurusa
Nagluluksa
na ang ibang nilalang

Naramdaman nila
na may mali
na nabulabog ang tulad nilang nilikha

Ngunit ang tao
naramdaman kaya niya
na may mali?
na may nabulabog?

Nakikiisa ba siya
sa paghihirap ng iba?
Binibigyan niya ba ng pagkakataon
ang mga salat at malas?
Ipinagtatanggol niya ba
ang mga pinagkakaitan ng hustisya?
Umiiyak ba siya kapag nakikita niyang
parang ang lii-liit ng kanyang nagagawa?

Marahil hindi...
Pagkat kaya niya pang maging masaya
Kahit na ang paligid niya'y
nagdurusa
nagluluksa.